Kongresi i SHBA, hetime për vdekjen e Kosta Trebickës

Kryetari i Dhomës së Përfaqësuesve, Henry Waxman, stafi i të cilit ka nisur një hetim
për trafikun e armëve dhe kontratat e kompanisë “AEY”, i ka kërkuar Sekretares së Shtetit,
Kondoleza Rajs, një raport lidhur me rrethanat e vdekjes së Trebickës, që sipas tij,
“janë të paqarta”. "Gazeta Shqiptare" publikon letrën ekskluzive të Kreut të Dhomës së
Përfaqësuesve drejtuar Kondoleza Rajsit.

WASHINGTON - Vdekja e dëshmitarit të trafikut të armëve në Shqipëri, Kosta Trebicka,
alarmon Kongresin amerikan. Kryetari i Dhomës së Përfaqësuesve, Henry Waxman, stafi i
të cilit ka nisur një hetim për trafikun e armëve dhe kontratat e kompanisë “AEY”, i
ka kërkuar Sekretares së Shtetit, Kondoleza Rajs, një raport lidhur me rrethanat e
vdekjes së Trebickës, që sipas tij, “janë të paqarta”. Ai ka kërkuar informata të
hollësishme nga zyrtarët e Departamentit të Shtetit për lidhjet e zyrtarëve me Trebickën
apo komunikimet me qeverinë shqiptare dhe të tjerë para vdekjes së dëshmitarit që
sinjalizoi Kongresin për aferën e armëve që iu shitën Pentagonit nga Shqipëria, nëpërmjet
“AEY”-së.

Letra e Waxman
“Më 12 shtator media njoftoi se një ish-nënkontraktor shqiptar i AEY-së, Kosta Trebicka,
vdiq në Shqipëri. Ai kishte bashkëpunuar për hetimin e komisionit të Mbikëqyrjes së
Reformës qeveritare lidhur me trafikun e armëve, duke siguruar informacione dhe dokumente
lidhur me aktivitetet e kompanisë AEY”, thekson Waxman në letrën drejtuar Sekretares Rice.
Ai vë në dukje se Trebicka kishte bashkëpunuar sipas ligjit federal për hetimin e AEY-së,
që rezultoi në ngritjen e akuzave ndaj saj dhe zyrtarëve të saj”. Waxman thekson se
“rrethanat e vdekjes së Trebickës mbeten të paqarta dhe se ka pasur sugjerime që ai mund
të jetë vrarë për shkak të bashkëpunimit të tij me hetuesit apo kritikave të tij ndaj
mënyrës se si qeveria shqiptare e trajtoi kompaninë AEY”. “Unë kërkoj që Departamenti
i Shtetit të sigurojë informata për stafin e komitetit lidhur me njohuritë që ka për
rrethanat e vdekjes së Trebickës”, - deklaron Waxman në këtë letër.

Ai paralajmëron zyrtarët e Departamentit të Shtetit, për të diskutuar lidhur me bisedat
apo bashkëveprimet që zyrtarët amerikanë kanë pasur me Trebickën apo qeverinë shqiptare.
“Duhet të jeni të përgatitur për të diskutuar edhe lidhur me bisedat që zyrtarët amerikanë
kanë zhvilluar me qeverinë shqiptare apo të tjerë para vdekjes së Trebickës”, -
thekson Waxman, duke shtuar se i gjithë informacioni duhej të paraqitej në komisionin e
Kongresit deri në datën 3 tetor. Stafi i Waxman po heton prej disa muajsh mbi kontratat
e parregullta që Pentagoni i ka dhënë AEY-së në shumën 300 milionë dollarë. Anëtarët e
komitetit morën në pyetje në qershor katër zyrtarë të lartë të Pentagonit, të cilët sqaruan
kontratat dhe kontrollet e kompanisë “AEY”.
Por, stafi i Wxman kërkoi informata më të hollësishme edhe nga Ambasada amerikane në
Tiranë lidhur me çështjen si dhe kontaktet e tyre me zyrtarët shqiptarë. Biznesmeni Kosta

Trebicka rezulton si një ndër dëshmitarët kyç edhe në raportin e hetuesve të Kongresit
amerikan lidhur me çështjen e kontratave të “AEY”-së. Ai i kishte dërguar një letër
Kongresit amerikan në maj 2007, ku shpjegon se zyrtarë të kompanisë “AEY” kanë instruktuar
nëpunësit e tij për të zhdukur shenjat kineze nga kutitë me municione.
Ínformatat e tij janë përfshirë në raportin e stafit ndihmës të Ëaxman, lidhur me aferën
e shumëdiskutuar të armëve. “Biznesmeni Trebicka, i punësuar nga AEY, i tha Komitetit se
detyra e tij ishte heqja e fishekëve nga kutitë e drunjta me shenja kineze dhe t’i
ripaketonte në kuti kartoni përpara transportit për në Afganistan”, thekson raporti i
publikuar nga stafi i Waxman. “Sipas Trebickës, Diveroli e pyeti atë “nëse ka shkronja
kineze në kutitë e drunjta apo në arkat metalike” dhe e instruktoi atë që “të sigurohej
që në kutitë e reja të kartonit nuk do të kishte fjalë në gjuhën kineze”, thuhet në raport.